Hríseyjarskóli er nú kominn í hóp heilsueflandi grunnskóla á Íslandi. Helstu markmið heilsueflandi skóla eru að skapa skólaumhverfi sem stuðlar að andlegri, líkamlegri og félagslegri heilsu og vellíðan nemenda og starfsfólks í samvinnu við heimili og nærsamfélag. Óskað var eftir fólki í heilsunefnd og hefur nefndin nú hist tvisvar sinnum. Í nefndinni sitja skólastjóri, tveir nemendur, fulltrúi kennara, starfsmanna og foreldra sem og einn aðili úr nærsamfélaginu. Næstu skref nefndarinnar eru að búa til heilsustefnu þar sem horft er á allt skólasamfélagið í heild og kynna hana vel.
Fyrstu áhersluþættirnir sem við munum innleiða eru geðrækt, hreyfing/öryggi, lífsleikni og mataræði/ tannheilsa. Við munum taka þátt almennings íþróttaátökum og síðustu tvær vikurnar hafa nemendur og starfsfólk tekið þátt í lífshlaupinu, sem er skemmtilegt verkenfi á vegum ÍSÍ.

Framundan er Sudburyvika og þar sem nemendur tengja sína vinnu við lykilhæfni þá var ákveðið að vinna með hana í dag. Allir hittust á sal og við ræddum um lykilhæfni, veltum orðinu fyrir okkur og lögðum línur að verkefninu. Síðan var skipt í þrjá hópa eftir aldri og sjálf vinnan hófst. Allir hóparnir fengu veggspjald með lykilhæfninni og vinnan fólst í að lesa, ræða um og skilgreina hvern þátt fyrir sig. Í hverjum hópi var ritari en skil voru með frjálsum hætti. Elstu nemendurnir völdu að skrifa texta og prenta, nemendur í 5. – 7. bekk völdu að gera hugtakakort í iPad og nemendur í 2. og 3. bekk völdu að skrifa á pappír og fengu síðan aðstoð við að koma textanum sínum í tövlu. Að lokum hittust allir á sal og hóparnir kynntu sínar niðurstöður. Þetta var mjög góð vinna og hengjum við verkefnin upp í stofunum og á salnum.

Nú er fyrsta lota ársins búin en það var smíða- og myndmenntalota. Í smíðalotunni smíðuðu allir nemendur skólans það sem þeim langaði að gera. Í myndmennt tókum við fyrir pappamassa og gerðum fígúrur.

Anna María & Tara Naomí

Að venju er margt um að vera í Hríseyjarskóla í desember. Nemendur máluðu jólamyndir í gluggana og Foreldrafélagið hélt árlegt jólaföndur þar sem nemendaráð seldi vöfflur og kakó. Búið er að skreyta skólann, fara í kakóferð á Verðbúðina 66, halda jólakvöldvöku og skera út í laufabrauð. Á leikskóladeildinni er líka búið að skreyta allt hátt og lágt, skrifa jólakortin og æfa jólalögin. Framundan er jólakortagerð og jólaþema auk litlu jólanna sem verða föstudaginn 20. desember. Nemendur eiga að mæta klukkan 9 á stofujól en gestir eru velkomnir klukkan 10, þá verður dansað í kringum jólatréð.

• 

Í tilefni að degi íslenskrar tungu héldu nemendur og starfsfólk Hríseyjarskóla hádegisboð í Íþróttamiðstöðinni. Dagskráin í ár var með öðru sniði en undanfarin ár en í þetta sinn var gestum boðið á tæknikynningu þar sem nemendur kynntu smáforrit sem notuð eru í kennslu við skólann. Fyrirkomulagið var þannig að nemendur höfðu valdið sér eitt smáforrit og útbjuggu kynningar og settu upp bása. Gestirnir gengu á milli bása og hlustuðu á kynningarnar, skoðuðu og fengu að prófa. Á tveggja mínútna fresti hringdi klukka og þá skiptu gestir um bása en nemendur héldu áfram að kynna sitt smáforrit fyrir næsta hóp. Kynningarnar gengu vel og stóðu allir nemendur sig vel og gaman var að sjá hve ánægðir gestirnir voru. Að loknum kynningum var gestum boðið upp á súpu að hætti Helenu og var það von okkar að allir væru saddir og sælir.

Þar sem um nýjung var að ræða var ákveðið að útbúa rafræna könnun til að meta hvernig til tókst. Gestir voru beðnir um að svara nokkrum spurningum og eins og sjá má á niðurstöðunum voru gestir ánægðir með þetta fyrirkomulag.

• 

• 

Barnasáttmáli Sameinuðu þjóðanna var 30 ára í gær, 20. nóvember, og því var þessi dagur á alþjóðavísu tileinkaður réttindum barna. Í tilefni þess var farið yfir barnasáttmálann með nemendum á sal og síðan haldið nemendaþing. Nemendum var skipt þvert á aldur í fjóra hópa og fengu allir hóparnir sama spurningalistann til að ræða um og svara. Hver hópur var með hópstjóra og ritara og gaman var að sjá hversu áhugasamir allir voru við vinnuna. Að lokum hittust allir hóparnir á sal og gerðu grein fyrir sínum niðurstöðum. Í Hríseyjarskóla leggjum við mikið upp úr því að raddir barna og ungmenna heyrist og tókum því þessu verkefni fagnandi.

Nú á dögunum fékk skólinn Osmo-standa að gjöf frá foreldrafélaginu. Osmo er notað í mörgum fögum hjá okkur til dæmis íslensku, stærðfræði, forritun og myndlist. Osmo-standarnir eru kærkomin viðbót og nú geta fleiri verið í Osmo í einu og þannig nýtist tíminn betur. Við þökkum Foreldrafélaginu kærlega fyrir þessa gjöf.

• 

Í tilefni af degi íslenskrar tungu var haldið hádegisboð fyrir Hríseyinga í Íþróttamiðstöðinni í dag. Nemendur buðu upp á tæknikynningu þar sem þeir kynntu hin ýmsu smáforrit og tækni sem notuð eru í náminu í Hríseyjarskóla. Einnig var Lubbi finnur málbeinið kynntur, það er kennsluaðferð sem leikskóladeildin notar í málvörun. Gestir fengu að sjá skemmtilega útfærslu af samkennslu málörvunar og forritunar og fengu að prufa. Gestum var boðið upp á súpu og brauð. Allir voru glaðir og ánægðir með daginn og við þökkum kærlega fyrir áhugasama gesti.

Nemendur og starfsfólk Hríseyjarskóla tók þátt í átakinu Göngum í skólann í september. Við vorum dugleg að koma gangandi eða hjólandi í skólann og auk þess stóðum við fyrir gönguferð um þorpið tvisvar sinnum í viku. Í síðustu viku lukum við átakinu með því að ganga saman Hringinn og fengum glæsilega ávaxtasendingu í boði Hríseyjarbúðarinnar. Elstu nemendur skólans skáru niður ávextina og allir fengu ávexti saman. Við þökkum Hríseyjarbúðinni kærlega fyrir glæsilega sendingu.

•