Skólaþing var haldið sl. fimmtudag í Hríseyjarskóla.

Við byrjuðum á sal þar sem Þórunn skýrði frá fyrirkomulaginu og skipti öllum í tvo hópa. Fjögur ungmenni voru fyrirfram búin að bjóðast til þess að vera hópstjórar og ritarar og leiddu þau hópa sína. Umræðuefnin voru að þessu sinni skólareglurnar og einkunnarorð skólans og ræddu hóparnir þessi málefni og fengu sér síðan hressingu en Helena bakaði handa okkur vöfflur. Að lokum kynntu hópstjórar og ritarar niðurstöður sinna hópa og í stuttu máli stungu báðir hópar upp á breytingum á einkunnarorðum skólans og skólareglunum.

Dagskrá þingsins var eftirfarandi:

1. Setning
2. Einkunnarorð og skólareglur unnið í hópum
3. Hlé – hressing
4. Samantekt og kynning
5. Þingslit

Markmið þingsins var að nemendur, foreldrar, starfsfólk og aðrir áhugasamir fengju tækifæri til að ræða saman um skólann og taka þátt í að móta stefnu skólans með því að  koma hugmyndum sínum á framfæri á lýðræðislegan hátt.

Við þökkum öllum sem mættu kærlega fyrir komuna og þátttökuna. Í framhaldinu verður unnið með niðurstöður þingsins og verða þær væntanlega tilbúnar fyrir jól.  

• 

• 

Skólasetning Hríseyjarskóla verður mánudaginn 23. ágúst kl. 11 á sal skólans. Foreldrar eru velkomnir en vegna sóttvarnaraðgerða verður 1 metra relga og foreldrar eru beðnir um að bera grímur.

Kennsla hefst samkvæmt stundaskrá þriðjudaginn 24. ágúst og að venju hefjum við skólaárið með skólaleikum.

Hlökkum til að sjá ykkur.

Leikskólinn opnar aftur eftir sumarlokun á morgun, 5. ágúst kl. 8:00.

Hlökkum til að hitta alla aftur eftir sumarfríið.

Verið velkomin á beint streymi frá árshátíðinni okkar laugardaginn 22. maí kl. 14:00.

Smellið hér fyrir hlekk inn á beint streymi sem hefst kl. 13:45

Miðaðverð í sal er 1.000 kr. en fyrir hvert tæki sem tengist streyminu kostar það 2.000 kr. þar sem nokkrir geta verið saman að horfa. Miðaverð rennur í ferðasjóð nemenda Hríseyjarskóla.

kt. 681088-3429
0177-05-403861
Streymi: 2.000 kr.

Góða skemmtun!

Það var nóg um að vera í apríl í Hríseyjarskóla og í þessum fréttatíma er stiklað á stóru. Umsjón höfðu Adam, Arnór, Stefán og Patrekur.

Undanfarin ár hefur grænfánanefndin legið í dvala hjá okkur þó svo að við höfum unnið með náttúruna og sjálfbærni. Nú á dögunum kölluðum við grænfánanefndina aftur til starfa og þar voru fyrstu skrefin stígin í þá átt að flagga aftur grænfána við Hríseyjarskóla. Þar sem áhugi var mikill meðal nemenda var ákveðið að kjósa ekki heldur bjóða öllum áhugasömum nemendum að vera í grænfánanefndinni út skólaárið og munum við funda vikulega fram að skólaslitum. Það er gaman að sjá hversu margir eru áhugasamir og tækifærin til að gera vel í umhverfismálum eru víða.

• 

Í ný liðinni Sudbury viku á vorönn 2021 vann Patrekur í 4. bekk skemmtilegt verkefni með aðstoð Júlíu og leikskóladeildar. Gefum Patreki Ingólfssyni orðið:

,,Í Sudbury vikunni var ég að reyna að finna verkefni til að vinna og ákvað að gera verkefni með elstu börnunum í leikskólanum. Ég ætlaði að byrja á þessu verkefni en það frestaðist mikið. Ég ákvað að búa til Lubba spil sem leikskólabörnin geta svo notað í starfinu. Ýmis vandamál komu upp við gerð spilsins en ég lærði heilmikið á því. Spilið er gert úr endurnýttum efnivið sem ég fann og ákvað að nýta t.d. plötu úr timbri, plasttöppum úr ragmagnsdósum, legokörlum, pappaboxi utan af skrúfum svo eitthvað sé nefnt“.

Elstu börnin hafa prófað að spila spilið í Lubbastund sem er tvisvar í viku. ,,Ég kenndi svo krökkunum í Lubbastund spilið og fylgdist með þeim spila en það var einmitt það sem mér fannst skemmtilegast við ferlið; að sjá þau spila. Ég bauð gestanemanda að vera með okkur sem hafði gaman af þó hann hafi ekki búið það til með okkur“.

Spilið heitir Lubbaspilið á Smábæ og er teningaspil sem gengur út á að æfa málhljóðin. Virkilega skemmtilegt verkefni sem nýtist vel í málörvunstundum á Smábæ. 

Skólahald í Hríseyjarskóla hefst samkvæmt stundaskrá þriðjudaginn 6. apríl og leikskólinn verður opnaður kl. 07:45.

Við minnum á almennar sóttvarnir og mikilvægi þess að halda börnum heima ef þau eru veik eða með einkenni um veikindi. Skólinn verður lokaður foreldrum og öðrum utanaðkomandi aðilum til 15. apríl. Nánari upplýsingar verða sendar til foreldra í tölvupósti.

Í haust opnaði leikskóladeildin okkar aftur. Nú eru 7 börn á leikskólanum og þar er líf og fjör alla daga.